«ҚазТрансОйл» АҚ Атырау мұнай құбыры басқармасының өнеркәсіптік қауіпсіздік, еңбек қауіпсіздігі және қоршаған ортаны қорғау бөлімінің еңбек қауіпсіздігі жөніндегі жетекші инженері Мұрат Ирзағалиев С.Өтебаев атындағы Атырау мұнай және газ университетінің студенттері, магистранттары мен оқытушылары үшін «ҚазТрансОйл» АҚ өмірлік маңызды ережелері және еңбек қауіпсіздігі мәдениеті» тақырыбында маңызды және мазмұнды қонақ лекциясын өткізді.
Лекция барысында Мұрат Ирзағалиев «ҚазТрансОйл» компаниясының өндірістік процесінде сақталуы тиіс негізгі қауіпсіздік ережелері мен принциптерін егжей-тегжейлі түсіндірді. Ол еңбек қауіпсіздігін және қоршаған ортаны қорғауды қамтамасыз ету маңыздылығын, сондай-ақ, компанияның барлық деңгейінде қауіпсіздік мәдениетін қалыптастырудың қажеттілігін атап өтті. Лектор өндірістік тәуекелдерді болдырмау, еңбек қауіпсіздігі мен экологияны қамтамасыз ету процестері туралы кеңінен тоқталды. Компанияның нақты жұмыс тәжірибелерінен алынған мысалдармен еңбек қауіпсіздігі мен қоршаған ортаны қорғау принциптерін қалай жүзеге асыруды ұғындырды.
Студенттер мен магистранттар, оқытушылар лекция барысында белсенді түрде пікір білдіріп, сұрақтар қойды. Лектор барлық сұрақтарға жауап беріп, еңбек қауіпсіздігі мен өнеркәсіптік қауіпсіздік саласында тәжірибе бөлісіп, өмірлік маңызды ережелерді жүзеге асырудың практикалық аспектілерін атап өтті.
