«ҚазТрансОйл» АҚ технологиялық процестерді басқарудың және метрологиялық қамтамасыз етудің автоматтандырылған жүйелері басқармасының жетекші инженері Есімжан Камалов тәртіп, шығармашылық және жауапкершілік туралы айтып берді.
Маған жұмыста позитивті адамдар ұнайды, бірақ сонымен бірге адам бойындағы әзілқой мінезі тәртіп пен жауапкершілікпен үйлесуі керек. Сондай-ақ, адамдардың пунктуалдылығын бағалаймын, мәселен біреу кездесуге кешігіп қалса, тіпті достарым болса да ұрысып қаламын. Мейірімді, жанашыр адамдар ұнайды. Ондай адамдарды мен ғана емес, барлығы да жақсы көреді.
Бір кездері сапасыз істей салған жұмысың уақыт өте келе өкінтуі мүмкін. Соны білгендіктен жұмысымды мүмкіндігінше дұрыс және жауапкершілікпен атқаруға тырысамын. Бұлай жасау маған сенімділік береді. Сондай-ақ, мынаны түсінген абзал, біздің жұмысымызда (метрологияда) қадағаламасаң соңы жағымсыз салдарға және компания үшін шығындар мен айыппұлдарға дейін әкелуі мүмкін.
Инженер – ол өзінің еңбек міндеттемелерін орындаумен шектелетін маман емес. Инженер әрдайым процесті жақсартуға ұмтылатындығымен ерекшеленеді, еңбек тиімділігін арттыру үшін жаңа нәрсе ойлап табады. Ол бастамашыл және шығармашылыққа толы.
Жұмысыңды соңғы минутқа дейін істеу маңызды. Бұл қалай? Мәселен, аты аңызға айналған неміс футболшысы, әлем чемпионаттарының үздік бомбардирі Мирослав Клозе мансабының соңында итальяндық «Лацио» клубында ойнайды. «Лационың» футболшылары жаттығудан кейін Клозенің допты бақылау техникасын жасау үшін тағы да қалып, сосын қызметкерлерді мазаламастан доптарды өзі жинай бастағанын көріп таң қалады. Ол мұны әр жаттығудан кейін, футбол стандарттары бойынша қартайғанына және соңғы маусымдарда ойнағанына қарамастан жасады. Клубтың жас ойыншылары кәсіби болудың осындай үлгісін көріп, оған еліктей бастады.
Мұнайды тасымалдау – бұл сенімділікті ғана емес, дәлдікті де қажет ететін көлемді технологиялық процесс. Қысым, температура, ағын және т.б. көрсеткіштер үнемі бақылауда болады. Мұнай көрсеткіштері ғана емес, өндірісті жүргізу үшін қажетті аралас процестердің барлық параметрлері өлшенеді. Тасымалданатын мұнайды есепке алу - өлшеу құралдарының көмегімен жүргізіледі. Ал біз, метрологтар, осы өлшеу құралдарының қажетті дәлдікке сәйкестігін қамтамасыз етеміз.
Әкем маған сағаттың бірінші шырылдағанынан-ақ оянуды үйретті. Ол өзі армиядағыдай ерте тұрып, тәртіпті қатаң сақтайды.
Қазір ақпарат ағыны үлкен кезеңде, адамның бес секундтан артық бірнәрсеге назар аударуы қиын, соған қарамастан балаларымның оқуға деген сүйіспеншілігін ояту мен үшін үлкен жеңіс болмақ.
Ата-анам маған адалдықты, үлкендерді және басқа да жалпыадамзаттық құндылықтарды құрметтеуді үйретті. Мен үшін балаларымның да осы қағидаларды ұстануы маңызды.
