Геннадий Кораблёв – «ҚазТрансОйл» АҚ Батыс операторлық қызметтер көрсету басқармасы КПО «Үлкен Шаған» МАС-ның ауысым бастығы ІІІ дәрежелі «Еңбек даңқы» орденімен марапатталды.
Марапаттау рәсімі Оралда Қазақстан мұнай өндірісінің 125 жылдығы мен Қарашығанақ кен орнының ашылғанына 45 жыл толуына арналған мерекелік шара аясында өтті.
Марапатты Қазақстан Республикасы Энергетика вице-министрі Әлібек Жамауов табыс етті. Жиын кезінде жобаның дамуына елеулі үлес қосқан басқа да ардагерлерге, өндіріс озаттарына алғыс хаттар мен медальдар табыс етілді.
Шараға мұнай-газ саласының өкілдері, ардагерлер мен Қарашығанақ жобасын дамытуға үлес қосқан жұмыскерлер жиналды.
Қарашығанақ кен орнының операторы болып табылатын Karachaganak Petroleum Operating B.V. компаниясы «ҚазТрансОйл» АҚ-тың сенімді және стратегиялық серіктесі болып табылады. Жобаның дамуына септігін тигізіп жатқан екеуара ынтымақтастық бағыты одан әрі жалғасын тауып жатыр.
Бүгінде Қарашығанақ кен орны көмірсутегі қоры жағынан Қазақстандағы ғана емес, әлемдегі ең ірі кен орындарының бірі болып табылады. Игеру жұмыстары жүргізілген жылдар ішінде мұнда жалпы көлемі шамамен 300 миллион тонна мұнай мен газ конденсаты өндірілді.
