Жұмысшы мамандықтар жылына орай «APEC PetroTechnic» Жоғары колледжінің автоматика және өлшеу-құрал слесарларын, сондай-ақ химиялық талдау лаборанттарын даярлайтын педагогтері Атырау мұнай құбыры басқармасындағы Т. Қасымов және Н. Шманов атындағы мұнай айдау станцияларына барды.
Сапардың басты мақсаты – тәжірибелі мамандардың жетекшілігімен зертханаларда мұнай сапасын бақылау алгоритмдерімен және автоматтандырылған технологиялық процестермен танысу болды.
Осы іс-шара «ҚазТрансОйл» АҚ бастамасының бір бөлігі болып табылады және мұнай тасымалдау саласының кадрлық әлеуетін дамытуға, нығайтуға және жұмысшы мамандықтарының беделін арттыруға бағытталған.
«Атырау мұнай құбыры басқармасының химиялық зертханасында өткен тағылымдама мен үшін аса құнды кәсіби тәжірибе болды. Педагог маман ретінде нақты өндірістік ортаға еніп, заманауи зертханалық жабдықтармен және талдау әдістерімен таныстым. Бұл студенттерді өндірістік ортаға бейімдеп, тәжірибеге бағыттап дайындауда үлкен маңызға ие», – деп атап өтті «APEC PetroTechnic» Жоғары колледжінің оқытушысы Әсем Жолдасқалиева.
Осындай жобаларды жүзеге асыру арқылы «ҚазТрансОйл» АҚ теория мен практиканы ұштастыруға, мамандарды даярлау сапасын арттыруға және жұмысшы мамандықтарын насихаттауға өз үлесін қосады.
