2023 жылғы қаңтар-қазан айларында Ақтау портынан экспортқа жөнелтілетін қазақстандық мұнайдың көлемі 2 млн 800 мың тоннаны құрады, бұл өткен жылдың осы кезеңімен салыстырғанда 981 мың тоннаға немесе 54%-ға артық.
Атап айтқанда, Ақтау портынан Баку портына қарай мұнай тасымалдау көлемі 964 мың тоннаға артып, 1 миллион 123 мың тоннаны құрады. Ақтау портынан Махачкала портына 1 млн 676 мың тонна қазақстандық мұнай жөнелтілді, бұл 2022 жылдың 10 айындағы осы кезеңмен салыстырғанда 17 мың тоннаға артық.
2022 жылы Қазақстан Республикасының Президенті Қасым-Жомарт Тоқаев Транскаспий дәлізі бойынша мұнай тасымалдау көлемін арттыруды тапсырды. Осы тапсырмаға сәйкес «ҚазМұнайГаз» ҰК АҚ мен Әзербайжан Республикасының SOCAR мемлекеттік мұнай компаниясы Теңіз кен орнынан «Баку-Тбилиси-Джейхан» мұнай құбыры бағыты бойынша жылына 1,5 миллион тонна мұнай тасымалдауды көздейтін келісім жасады.
