Oil Transportation Management - KazTransOil - жер қойнауын пайдаланушылар үшін «Бірыңғай терезе» ақпараттық жүйесін өнеркәсіптік пайдалануға беру басталды

«ҚазТрансОйл» АҚ мұнай тасымалы бойынша клиенттермен өзара іс-қимылды «бірыңғай терезе» қағидаты негізінде жүзеге асыруға арналған Oil Transportation Management — KazTransOil (OTM-KTO) жаңа ақпараттық жүйесін өнеркәсіптік пайдалануға енгізді. Цифрлық платформа «ҚазТрансОйл» АҚ-ның мұнай құбырлары жүйесі арқылы қызмет көрсету үдерістерін, сондай-ақ «МұнайТас» СБҚК ЖШС және «Қазақстан-Қытай құбыры» ЖШС мұнай құбырлары арқылы тасымалдауды ұйымдастыру үдерістерін автоматтандыруға мүмкіндік береді.

Жобаның мақсаты – мұнай тасымалы бойынша қызмет көрсетуге қатысты құжаттық рәсімдерді, өтінім беруден бастап маршруттық тапсырмаға дейінгі барлық үдерісті онлайн форматта автоматтандыру және жеңілдету.

Цифрлық шешімнің негізгі мүмкіндіктері:

• мұнай тасымалына арналған өтінімдерді автоматты түрде беру және келісу;
• ҚР Энергетика министрлігінің Oil Transportation Management жүйесімен интеграция;
• «ҚазТрансОйл» АҚ мен жер қойнауын пайдаланушылар арасында ақпарат алмасуды автоматтандыру;
• бекітілген кестелерге сәйкес төлем тапсырмаларын, үзінді-көшірмелерді және басқа да құжаттарды есептеу және қалыптастыру.

Пайдаланушылар үшін артықшылықтары:

• құжаттарды ресімдеу, тапсыру және өңдеу уақытының қысқаруы;
• өтінімдер мен төлемдердің мәртебесін нақты уақыт режимінде қадағалау мүмкіндігі;
• адами фактордың әсерін азайту;
• өзара іс-қимылдың барлық кезеңіне арналған бірыңғай цифрлық интерфейс;

Өнеркәсіптік іске қосуға дайындық аясында жобалау кезеңдері аяқталып, бизнес-модельдер тестіленді, ақпараттық қауіпсіздік құралдары енгізілді және Қазақстан Республикасы Энергетика министрлігінің жүйесімен сенімді интеграция қамтамасыз етілді.

OTM-KTO жүйесін өнеркәсіптік пайдалануға енгізу Қазақстанның мұнай тасымалдау саласын жаңғыртудағы маңызды кезеңге айналып, мұнай тасымалы қызметтері нарығында неғұрлым икемді, технологиялық және клиентке бағдарланған өзара іс-қимылдың негізін қалады.