Биыл Қарағанды мұнай құбыры басқармасына қарасты «Атасу» бас мұнай айдау станциясының пайдалануға берілгенін 35 жыл толады. «Павлодар-Шымкент» магистральдық мұнай құбырының 681-шақырымында орналасқан станцияның іргетасы 1986 жылы қаланып, үш жылдан кейін қараша айында тұсауы кесілген.
Маңызды нысанның басты мақсаты Батыс-Сібір мұнайын Чарджоу, сол секілді Омбы-Павлодар-Шымкент бағыты бойынша тасымалдау болған. 2000 жылы мұнай құю эстакадасы пайдалануға беріліп, 2005 жылға дейін Қытай және басқа бағытта 5 млн тоннадан астам мұнай тиелген. Сол жылы «Атасу-Алашаңқай» құбыры пайдалануға берілді. Қазіргі таңда станциядағы резервуарлар паркінің жалпы сыйымдылығы 100 мың текше метрді құрайды.
