Атырау мұнай құбыры басқармасы Қазақстан Республикасы мұнай-газ кешені қызметкерлерінің күніне орай өткізілген салтанатта озаттарды марапаттап, ардагерлерге құрмет көрсетті.
Мерекелік салтанатты ашқан Атырау мұнай құбыры басқармасының бастығы Өтеу Есмұрзин мұнайқұбыршыларды төл мерекесімен құттықтап, игі лебізін білдірді.
«ҚазТрансОйл» компаниясы – бүгінде Қазақстанның экономикасында өзіндік орны бар, инфрақұрылымы нық дамыған мұнай тасымалдаушы оператор. Елдің әлеуетін арттыруға маңызы зор құрылым. Оның ішінде Атырау мұнай құбыры басқармасының ұжымы да атсалысуда. Сіздердің ерен еңбектеріңіздің арқасында мұнай құбыры үздіксіз және ақаусыз қызмет етіп тұр. Осы орайда Сіздерді мерекемен құттықтай отырып, отбасыларыңызға береке, еңбектеріңізге табыс тілеймін», - деді.
Салтанатта басқарма бастығы еңбекте озат қызметкерлер: Су асты техникалық жұмыстар учаскесінің сүңгуірлер жұмысы шебері Жұмабай Оқасовты «Мұнай-газ кешенін дамытуға қосқан үлесі үшін» медалімен, өндірістік қызмет көрсету базасының электромонтері Сергей Пастуховты ҚР Энергетика министрлігінің «Алғыс хатымен» және апатты қалпына келтіру пунктінің желілік құбыршысы Амантай Тәжиевті «ҚазМұнайГаз» ҰК АҚ «Естелік белгісімен» марапаттады.
Сондай-ақ, бір топ қызметкер жемісті еңбегі үшін «ҚазТрансОйл» АҚ бас директоры Талғат Құрманбаевтың «Құрмет грамоталары» және «Алғыс хаттарын» иеленді.
Мерекелік салтанатта жас мамандардың да еңбегі еленді. Белсенді жас мамандар мерекеге орай, «ҚазТрансОйл» АҚ әлеуметтік-еңбек қатынастары және жалпы мәселелер жөніндегі басқарушы директоры Ғазиз Қошановтың атынан «Алғыс хаттармен» марапатталды.
