АО «ҚазТрансОйл» компаниясының арталық аппаратында мұнай-газ саласының тәжірибелі маманы, жазушы Хайдар Маратұлы Байзақовпен жылы жүздесу өтті.
Кездесу барысында кеңсе қызметкерлері жазушының шығармаларына ерекше қызығушылық танытып, оның әдеби кейіпкерлері мен туындыларының тарихына қатысты мазмұнды сұрақтар қойды. Әсіресе «Пасынки степи» атты тарихи повесі кеңінен талқыланып, XVI ғасыр оқиғалары мен қазіргі заман көріністерінің шебер тоғысуы ерекше атап өтілді.
Хайдар Байзақов өзінің шығармашылық жолы мен жазушылық шабыт жайлы ой бөлісе отырып, терең философиялық тұжырым айтты. Оның пікірінше, адам баласы өзгермейді – XVI ғасырда өмір сүрген адамдар мен бүгінгі заман адамдарының болмысы бірдей. «Адамның киген киімі, мінген көлігі өзгеруі мүмкін, бірақ ішкі жан дүниесі, мінезі мен құндылықтары, тілектері мен армандары өзгермейді», – деді жазушы.
Жылы әрі еркін атмосферада өткен кездесудің соңында автор қатысушыларға өз кітаптарын тарту етіп, әрқайсысына жүрекжарды тілектерін жазып, қолтаңбасын қалдырды.
Бұл әсерлі жүздесу компания қызметкерлеріне ерекше рухани шабыт сыйлап, әдебиет пен тарихты ұштастырған тағылымды сәтке айналды.
